A Chodiguería Tergüelana
*
FALORDIAS CHUDEO-ESPAÑOLAS DE TRADIZIÓN ORAL REPELGATAS POR MATILDA KOEN-SARANO***************
*******
**
*
DIZIR LA VERDAD, PERDER L´AMISTAD
Kontado por Levana Sassón, 1988
*
Avía una mujer biuda, ke tinía un ijiko. Esta mujer lo edukava al ijiko ke diga siempre sólo la verdad.
Le dizía: "Tú di siempre sólo la verdad i vas a ganar toda la vida!". I kada vez ke él dizía alguna mintira, eya lo aharvava, i ansí el ijiko no se alvidava i dizía: "Yo v´a dizir sólo la verdad!"
Eyos moravan en una siudad ande un vizir, ke era muy feo. Todos se spantavan d´él i dinguna mujer no kiría kazarse kon él. Amaba a ken le dizía ke es ermozo le dava parás, le dava todo.
El ijiko de la biuda kresió i se izo manseviko i este vizir lo tomó a su servisio i lo kiría mucho bien. Lo mirava komo ijo suyo i le dizía: "Yo te v´a dar todo lo ke keres!".
Una vez el vizir vino ande este manseviko, le demandó: "Es verdad ke yo so muy ermozo?".
Le disho el manseviko: "No! La verdad es ke sos muy feo!":
Akel ke le uyó ke le diho: "Sos muy feo!",le disho: "A! Si es asina, yo no te v´a dar mas nada! Ni a ti, ni a tu madre, bien k´es biuda! De agora vos v´a arrondjar de esta siudad!".
El manseviko vino en kaza yorando. Le disho a la madre. "Mamá, mira tú me dizías siempre: dí sólo la verdad i vas a ganar toda la vida! Agora dishi la verdad, perdí toda la vida!".
"Ah, ijo mío!", le disho la madre: "Es verdad ke te dishi:: dí siempre la verdad, ma una koza m´alvidí de ambezarte: ke ken dizi la verdad piedre l´amistad!".
*
CONQUISTA DE GRANADA
(2 de enero de 1492)
*
EXPULSIÓN DE LOS JUDÍOS
(31 de marzo de 1492)
*
PRIMERA GRAMÁTICA
(Nebrija, 1492)
*
DESCUBRIMIENTO DE AMÉRICA
(12 de octubre de 1492)
*
CONQUISTA DE GRANADA
(2 de enero de 1492)
*
EXPULSIÓN DE LOS JUDÍOS
(31 de marzo de 1492)
*
PRIMERA GRAMÁTICA
(Nebrija, 1492)
*
DESCUBRIMIENTO DE AMÉRICA
(12 de octubre de 1492)
*
*
