*
II. MILIETA Y CHUANET
Milieta, moza de o lugar y filla de Siña Petra yera una mesacha que contaba bentiseis añadas. O suyo padre, dende que no más, lo tresbatió afogau en o río de traza no guaire platera, pos se deziba que si eba siu por trobar-se embruxau.
A mesacha, que no en eba de chermans, remataba de tornar de Barzelona ande sirbió dende ninona. Astí, dimpuesas de fer de criada bellas añadas, en aprendió de os modos y trazas de charrar de a zeudá. No ye que no en ese prous de modos porque, en tocante a ixo que se clama educazión, a ras chens de o Alto Aragón to se les fa curto, de cumplius y modosos que yen toz. (Asinas empenzipia a nobela de Chuaquín Castillo)
*
BELLAS PARABRAS SOPRE L´AUTOR
*
"Chuaquín Castillo Bestué naxié en Auch (Franzia) o 14 de chulio de 1938, güeito diyas dimpués de que o suyo pai morise en un bombardeyo en a "Bolsa de Bielsa".
A poco más de l´añada torna con a suya mai ta o lugar familiar, Puyarruego. Bi ye astí dica ras 14 añadas. Dimpués ye en os Salesianos de Uesca, en do fa os primers estudios. Autualmén triballa (triballaba en la añada 1989, calendata en a que se publicó iste libret) en Uesca como mayestro de tallers d´educazión espezial.
Ye miembro de o Consello d´a Fabla Aragonesa. Ha publicau bels triballos y articlos en a rebista Fuellas. Triballó en "A L´AIRE" libro de ista mesma coleuzión. En 1984 otenié un "onso de plata" en o III Premio Literario "Bal d´Echo" con a suya narrazión "Os maquis", en a qu´emplega como matiera literaria os remeros de mozez en o suyo lugar. Igual fa tamién en a narrazión A casa maldada, con un atro tema qu´en tien pro de tradizión en a montaña, as broxas y os suyos maldaus, y con una estensión más ampla." (Prenito d´a solapa d´o libro.)
*
