ENTA PARÍS
*
En a meyodiada de o diya 24 de chunio
de 1939, dimpués de un largo caminar siguindo primeramén a corrién de o río
Guadalope y más adebán de o Galligo, alufré a ra fin, en a bastida de o
paisache, un chigantesco menir que os ombres eban baltizato con o nombre de
peña Foratata. Aquera ambiesta de o mallo calizo, que amoniqué se achigantaba
debán de yo, espuntaba que o mío largo dondiar dende as tierras baxas de Aragón
daban rematanza. China chano puyé ta dixar dezaga ra peña, chalfegando, posando
cada bez de forma más contina ra mía man en os muslos ta aduyar a ros musclos
en cada escamallo, uns escamallos que os libianos enduraban malamén y que en a
larga puyada sentiban somo si aquer aire emplito de a color berda de os fabos,
querese estar un terne fizón meso contra yo por Dios sabe quí. Me aturaba. Y
en os intes en que ixa punchante dolor m´en permitiba, pensaba en cómo eba
podito dondiar más de doszientos quilómetros solenco, con a sola aduya de a
flecha que debuxan as corriéns y contracorriéns. En a tardada, ya bi yera
dezaga de yo –cuasi sin beyer-se ro suyo puntón- a Foratata y, más abaxo,
amagato en o fundo de a bal, o lugar de Sallén. Debán de yo, agora, en os cambos de Formigal beyeba debantando-se sobre un estranio orizón, o
perfil rocalloso de un pex amanixendo dende, talmén, os galachos glazials. Iste
grandizo y anglucioso pex que parixeba ubrir a suya boca en siñal de menaza,
yera o Midi d´Ossau, biello bechilán de o branquil de una Europa en paz”
(Eduardo Vicente de Vera. AS FUELLAS DE PARIS)
*
*
*
*
***
**
*
**
*
